About the Place 關於這個地方
Chiang Mai Retreat 清邁靜修營
November 11 - 15, 2026
第一日到埗，你會發現，成個靜修營只係得我哋。
餐廳入面見到嘅，都係熟口熟面；
行過木橋、路過草地，唔會有其他住客突然出現。
呢幾日，呢個空間就只盛載我哋呢一班人。
呢度嘅時間，好似真係比世界慢三拍。
放低行李，坐喺水邊飲第一啖水，
身體會先一步知道：「可以鬆開喇。」
電話仍然可以上網，
但你會發現自己愈來愈少攞起佢，
因為眼前已經有好多東西，可以慢慢望、慢慢感受。
行幾步，你可能就會遇到四隻被收養嘅狗狗。
有啲黏人，有啲怕醜，有一隻曾經被虐待，
但依然會好奇咁走埋嚟嗅嗅你，
用一種好單純、好期待嘅眼神望住你。
佢哋唔係「節目」，只係同你一樣住喺度，
路過你身邊，提醒你生命其實可以好直接、好坦白。
你住嘅唔係酒店標準房，而係由建築師將傳統泰式舊穀倉改建成嘅小屋。
每一間都保留住木結構同舊米倉嘅質感，再加上簡單乾淨嘅陳設。
冇兩間小屋係一樣，有啲靠水、有啲靠田，
你可能會慢慢對自己嗰一間產生一種「原來我係屬於呢度幾日」嘅感覺。
成個空間，好似一條細細地、但充滿生命力嘅村落。
小屋之間有橋、有步道、有樹、有花、有稻田。
你行路時，耳邊係雀聲同風聲；
轉個彎，可能就見到一頭慢慢行、完全唔當人類係一回事嘅水牛，
安安靜靜咁曬緊太陽。
生活上，所有基本嘅舒適都已經幫你準備好。
有冷氣，有獨立浴室，有小雪櫃，有 Wi‑Fi。
你唔需要「露營式」咁將就，亦唔會被過分豪華嘅設施拉走注意力;
一切啱啱好，讓你可以安心生活，同時仲保留足夠空間去感受。
食物方面，廚房基本上就係同大自然合作。
菜同香草都喺園裏採返嚟，
洗一洗，就上到砧板同鍋入面，
變成實在又細緻嘅泰式家常菜。
你會食得出，嗰啲味道唔係設計出嚟，而係喺呢度慢慢長出嚟。
靜修營裏面，有一條由瀑布流出嚟嘅山溪貫穿整個空間。
旁邊有一小塊沙灘，有懶洋洋嘅豆袋凳仔；
有啲人會曬太陽，有啲人會坐喺水邊發呆，
有啲人乾脆抱住一個大水泡慢慢喺河上飄。
你可以揀企喺岸邊聽水聲；亦可以落水，
俾身體記返起點樣同水一齊流動。
幫「小豬」水牛洗澡
度假村養咗四頭水牛，其中一頭係少見嘅粉紅色水牛，叫做「小豬」。
有一日，你可以落河幫佢洗澡——
真係攞刷，喺水裏慢慢幫佢擦身。
佢會好乖咁企喺度，間唔中郁一郁耳仔，
同你保持一種又認真、又有少少好笑嘅互動。
成件事好簡單，但會令人莫名其妙地開心。
記得帶一套唔怕濕、唔怕污糟嘅舊衫，仲有你嘅幽默感。
因為呢個體驗，本身就介乎「好認真」同「好好玩」之間。
離開度假村，大概五分鐘車程，你就會去到另一個世界。
樹葉變得更厚，聲音變得更闊，一道巨型瀑布喺前面打落嚟。
你可以企喺遠少少嘅位置，感受水霧打喺皮膚上的冰涼；
亦可以行近啲，甚至直接跳入瀑布下嘅水池，
俾成個身體同呢股力量真正接觸。
如果你想試下，用身體、用呼吸、用每天發生嘅小事，
重新感受一次自己嘅人生，呢個靜修營會好樂意借幾日時間畀你。
